1. Algemeen:

Die wens om in Wenen ´n erediens in die Afrikaanse taal moontlik te maak, is reeds sporadies sedert 1998 geuiter. Gedurende die somers van 2000 het ´n groep geinteresseerdes ´n uitdruklike versoek daartoe gerig. Mevrou Rina Loader het ´n klein skakelkomitee (bestaande uit haarself, Marinda du Preez en Lydia von Wielligh) georganiseer om die moontlikhede te ondersoek. So het dit gebeur dat die ondergetekene genader is om op reëlmatige grondslag Afrikaanse erediense in Wenen aan te bied.  Die komitee het ook ontdek dat ´n tweede predikant, Dr. Jan de Jongh van Arkel, kort tevore uit Suid-Afrika na Oostenryk verhuis het en naby Linz woonagtig is. Hulle het voorgestel dat hy ook uitgenooi word om deel te neem. Mevrou Loader het kontak opgeneem met Pfarrer Mag. Johannes Wittich, MST, met die vraag en die versoek of so ´n onderneming in die Erlöserkirche moontlik sou wees. Nadat die Presbyterium van die gemeente in dié verband ´n positiewe besluit geneem het, het die eerste erediens op 8 Oktober 2000 plaasgevind.

2. Interessanthede

Die gemeente bestaan hoofsaaklik uit afrikaanssprekende gereformeerd-calvinistiese gelowiges wat hulle in Wenen en omstreke bevind en hier leef en werk. Die meeste lidmate is nie perament in Oostenryk gevestig nie, maar werk op kontrakbasis by ´n verskeidenheid van organisasies soos die ambassade of die VVO.  Daarbenewens is ook ´n klein groepie van Afrikaanssprekendes wat langdurig in Wenen woonagtig is. Ook is mense wat reeds jare lank aan die Vienna Community Church verbonde is, geinteresseerd om die Afrikaanse dienste by te woon.

 Tot op datum het 32 persone belangstelling vir die eredienste getoon en/of prakties daaraan deelgeneem.  Vyf van hulle het reeds weer na Suid-Afrika teruggekeer. Twee ander is Oostenrykers, wat in Niederösterreich ´n plaas het en daarom Sondae geen kerkdiens vroeër as 11.30 kan bywoon nie (as gevolg van hulle Nederlandse kennis verstaan hulle Afrikaans).

Dit is ongelukkig nie meer moontlik om met behulp van die Suid-Afrikaanse ambassade die bestaan van die Afrikaanse gemeente aan nuwe aankomelinge bekend te maak nie as gevolg van die huidige strenge skeiding tussen staat, kerk en godsdiens. Daarom is ons hoofsaaklik op mondelinge bekendmaking aangewese. Verder het die bogenoemde familie uit Niederösterreich van ons bestaan berig gekry uit die offisiële dokumente van die Evangelische Kirche.

3. Eerste gemeentevergadering

Op 8 Oktober 2000 is daar na die eerste erediens ´n gesprek gevoer oor die voorwaardes vir die versorging van die Afrikaanse gelowiges in Wenen. As voorsitter en sekretaris is die ondergetekende verkies.

3.1 Voorstelle was die volgende:

(a) Ofskoon alle deelnemers lidmate van Gereformeerde Kerke in Suid-Afrika is, en desnieteenstaande die feit dat ondergetekende met opdrag van die destydse Algemene Kommissie van die Hervormde Kerk van Afrika hom met die kerklike versorging van lidmate wat dit sou verkies, moet bemoei,  sal die Afrikaanse eredienste nie tot die vorming van ´n enkele groep of miniatuurgemeente lei nie.  Eerder sal die gemeentlike werk as deel van die Reformierten Pfarrgemeinde Wien-Süd en onder die beskerming van die huidige Presbyterium ingerig word.

(b) Ten spyt van die begrip wat daarvoor bestaan dat amptelike toetrede tot die Reformierten Kirche in Oostenryk vir kortstondige inwoners problematies is, sal daarmee gereken word dat dit aanbevelingswaardig is.

(c)  Die maandelikse kollekte sal aan die Reformierten Pfarrgemeinde Wien-Süd oorbetaal word.

(d)  Eredienste sal, sover moontlik, elke tweede Sondag van die maand om 11.30 in die Erlöserkirche plaasvind. Tog sal uitsonderings, veral in die  somermaande, ´n moontlikheid bly.

(e) In ooreenstemming met die Suid-Afrikaanse situasie sal nagmaal in Februarie, Mei, Augustus en November gevier word. Ook hier sal met onvoorsiene omstandighede wat vooruitgeskou veral in Augustus te wagte kan wees, gereken word.

(f) ´n Uitnodiging om ´n kontakpersoon na die sittings van die Gemeindegremien te stuur, word aanvaar.

(g)  Die predikante word nie betaal nie, ofskoon - wanneer nodig - met reiskoste vir Dr. van Arkel uit Linz gereken sal word.

 3.2 Aanvaarde besluite:

(a)  Al die genoemde voorstelle onder 3.1.
(b)  Die Reformierten Gemeinde Wien-Süd word hartlik vir hulle vriendelike opname bedank.
(c)  Sover moontlik, sal ´n gemeentelike ete of koffie na die maandelikse erediens plaasvind, waarna die pastoriepaar Wittich uitgenooi word.

 3.3 Algemene mededelings uit die vergadering:

(a)  Die vergadering verklaar hulle bereid om na aanleiding van die problematiek rondom die offisiële kerklike bydrae, ´n bedrag in die nabyheid van die normale kerklike offergawe tydens die gewone kollekte by te dra.

(b) ´n Paar Afrikaanse gesangboeke, ´n koraalboek en nagmaalstel is vir gebruik voorhande en mag in ´n toegewese kas gestoor word.

(c) ´n Orrelis, ´n pianis en ´n violis is beskikbaar en kan soos nodig die begeleiding vir gemeentesang waarneem.

(d) Die Algemene Kommissie van die Hervormde Kerk in Suid-Afrika sal deur die ondergetekende van die nuutste verwikkelinge en   beplanning ingelig word.

O.Univ.Prof.Dr.DDr. James Alfred Loader, VDM

16 Januarie 2001